مقالة علاء الاسوانى فى جريدة المصرى اليوم حوار بين مرشح رئاسي احمد شفيق وشخص مهم المشير طنطاوى ؟

ahmedalmasry

New Member


مقالة علاء الاسوانى فى جريدة المصرى اليوم حوار بين مرشح رئاسي احمد شفيق وشخص مهم المشير طنطاوى ؟

كتبهاعلاء الأسوانى ، في 7 مايو 2012 الساعة: 20:52 م




http://im30.gulfup.com/2012-05-10/1336643440441.jpg





مقالة علاء الاسوانى فى جريدة المصرى اليوم

…حوار بين مرشح رئاسي وشخص مهم ……





المرشح الرئاسي - آلو ..صباح الخير يافندم



… الشخص المهم - أهلا وسهلا ..فينك من زمان ما سمعناش صوتك ..؟!



المرشح - والله يافندم أنا مشغول في الحملة الانتخابية . كل يوم أزور محافظة وأعمل مؤتمر انتخابي لما الواحد تعب جدا ..



المهم - شد حيلك ..مافيش حاجة بالساهل



المرشح - أنا تلميذك يافندم .سيادتك قدوتنا وعلمتنا العطاء بلا حدود …



المهم - .. أنت عاوز حاجة ..؟!



المرشح - أبدا يافندم ربنا يخليك . أنا قلت أتصل عشان أهنيء سيادتك على عملية العباسية . الحقيقة كانت روعة .. سيادتك أعطيت درس مهم للعيال المخربين



المهم - الحمدلله ربنا وفق . العملية كانت منظمة ومدروسة بعناية ..الحقيقة ضباط أمن الدولة عملوا شغل عظيم



المرشح - ضباط أمن الدولة رجال وطنيين وعارفين شغلهم تمام .. لايمكن نستغنى عنهم أبدا . الاحتفاظ بجهاز أمن الدولة كان قرار حكيم جدا ..



المهم - طبعا . لو كنا سمعنا كلام العيال بتوع التحرير وألغينا أمن الدولة كان زماننا دلوقت في حيص بيص . لايمكن لأى سلطة في مصر تستغنى عن ضباط أمن الدولة . هم الوحيدين اللى يقدروا يضبطوا البلد



المرشح - أجمل حاجة في عملية العباسية ان اللى أدبوا المخربين لا جيش ولا شرطة .. دول مصريين عاديين تعبوا من الفوضى قاموا نزلوا وضربوا المعتصمين وموتوهم من الضرب .فعلا مواطنين شرفاء .



المهم ( يضحك ) - هم صحيح مواطنين شرفاء لكن أخذوا فلوس كثير



المرشح - وماله يافندم مش خسارة فيهم.. النهارده لما العيال المخربين يعرفوا ان ماحدش حيسيبهم يعتصموا ويتظاهروا بعد كده .البلد تستقر وتهدا وعجلة الانتاج تدور .مش معقول كل قرار تأخذه الدولة يعترضوا ويتظاهروا . .



المهم - الكلام ده كان زمان وجبر ..من هنا ورايح أى حد ناوي يعمل مشاكل هنتعامل معه بكل حزم ..حتى أهالى المحبوسين راحوا عند القضاء العسكري وأول ما بدءوا يهتفوا طلعت عليهم الشرطة العسكرية وضربتهم علقة سخنة وعلمتهم الأدب



المرشح - ربنا يبارك فيك يا فندم .. سيادتك عارف والله أنا ساعات أقول لو كنا اتعاملنا بحزم مع العيال دى من الأول . كان زمان سيادة الرئيس مبارك معزز مكرم



المهم - الحق على العادلي وزير الداخلية ..هو أساء تقدير الموقف . في النهاية كل شيء نصيب



المرشح - أنا صعبان على الرئيس مبارك . سيادتك عارف النهارده عيد ميلاده



المهم - عارف طبعا وكلمته عيدت عليه .ربنا معه .

المرشح - دائما أصيل يافندم .. عندى أكثر من موضوع مهم عاوز أكلم سيادتك فيهم .



المهم - خير …؟!



المرشح - انت عارف سيادتك الشباب عندي في الحملة قاعدين طول النهار على النت بيتابعوا كل حاجة .. فيه على النت فيديو مصور البلطجية اللي ضربوا المتظاهرين وهم نازلين من سيارات الجيش وفيه واحدة ست طلعت في قناة دريم وقالت انها شافت بعينها البلطجية وهم بيستلموا سلاح من قسم الوايلي



المهم - وايه كمان ..؟



المرشح - الشيخ حافظ سلامة عمال يقول في كل مكان ان أفراد الشرطة العسكرية اقتحموا مسجد النور بالأحذية وضربوا رصاص وقبضوا على المصلين وعلى البنات في الجامع .



المهم - وبعدين ..؟!



المرشح - أنا قصدى ان أمن الدولة يضغط في الاعلام عشان الحكايات دى ما تعملش تأثير في الرأى العام .

المهم ( بانفعال ) - طبعا أمن الدولة أعطى تعليمات واضحة للاعلاميين والكتاب الوطنيين اللى بيشتغلوا معه عشان يعملوا تهدئة للناس . لكن في النهاية عاوز أقول لك حاجة : فيديو ولا شهود ولا الشيخ فلان قال ولا عاد .. .. الكلام ده كان يفرق معنا زمان .. دلوقت خلاص . اللى عاوز يصور يصور .. احنا كده وبنعمل كده وهنعمل كده كل مرة يحصل فيها شغب . اللى عاوز يعمل مظاهرة بعد كده لازم يفهم انه ممكن يموت في أى لحظة .لو خايف على حياته يقعد جنب أمه وما يعملش فيها رجل . لازم ننظف البلد من العيال المخربين كلهم . النهارده جابولي تصريحات شيخ جليل من مجمع البحوث عارف قال ايه ..؟!



المرشح - قال ايه يافندم ..؟!



المهم - الشيخ العظيم ده قال ان من حق السلطة في أى بلد مسلم انها تقتل ثلث الشعب من أجل مصلحة الثلثين .. دا رأى الاسلام واحنا الحمدلله مسلمين ..



المرشح - ونعم بالله يافندم .. أهو كده الكلام ..



المهم - يبقى سيب اللى عاوز يصور يصور ..احنا صاحيين ومن هنا ورايح أى واحد يعمل شغب حنقصف رقبته ..



المرشح - يا فندم أنا فعلا مبهور بسيادتك . . سيادتك عندك دائما بصيرة للمستقبل . دائما سيادتك تصحح لي رؤيتي وتنظم لى أفكاري وتوريني أبعاد ما اقدرش اشوفها لوحدي .. ربنا يبارك في سيادتك ويخليك لمصر يافندم . .



المهم - عاوز أقول حاجة .. مش معنى اننا نأدب العيال المخربين اننا نخالف القانون أبدا



المرشح - طبعا يافندم سيادتك علمتنا احترام القانون .



المهم - بالتأكيد . مصر دولة مؤسسات . اللى معه دليل يقدمه للنائب العام وانت عارف هو بيتخذ الاجراءات فورا



المرشح - طبعا . النائب العام رجل ممتاز



المهم - الحقيقة النائب العام خبرة قانونية فذة ونادرة .



المرشح - أنا طولت على سيادتك يافندم .؟!.



المهم - عاوز ايه تاني ..؟!. ما أنا عارفك . طول عمرك تحب اللت والعجن ( يضحكان )



المرشح - معلهش يافندم . يا ما سيادتك استحملتنى . .



المهم - يالله ياخويا . قل بسرعة



المرشح - دلوقت يافندم سيادتك عارف انى توليت مسئوليات صعبة . أنا بذلت كل جهدي زى ما سيادتك علمتنى . طبعا الانسان اللي بيشتغل في مصر لازم يكون له أعداء .. حزب أعداء النجاح يافندم . ناس نفوسهم مليانة حقد وغل .يحبوا يشككوا في أى انسان محترم ويتهموه بالباطل



المهم - كفاية موضوعات انشا . ادخل في الموضوع ..



المرشح - سيادتك عارف بعد ما تنحى سيادة الرئيس مبارك .الناس الحاقدين دول قدموا ضدى بلاغات .كلها بلاغات كيدية يافندم ربنا يعلم ..الكلام ده بقى له أكثر من سنة . بعدين فجأة من أسبوع استدعوني للتحقيق . سيادتك يرضيك الكلام ده .؟!.



المهم - عاوزني أعمل لك ايه ..؟!



المرشح - يافندم . أنا خدمت مصر بمنتهى الأمانة ومنتهى النزاهة . يافندم أنا تعلمت من سيادتك انكار الذات والتضحية في حب مصر . يقوموا آخرتها يحققوا معايا ..؟!



المهم - لما أنت سليم . خايف من التحقيق ليه .؟!.



المرشح - أبدا يا فندم أنا مش خايف. أنا يهمنى ان سيادتك تكون راضى عنى . لو سيادتك راضى عنى أروح التحقيق وأنا مطمئن ..



المهم - أنا لا يمكن أتدخل في أى تحقيق أبدا ..



المرشح - قطع لساني يافندم قبل ما أطلب من سيادتك تتدخل في التحقيق . أنا تعلمت من سيادتك احترام القانون . أنا كل اللى عاوز أعرفه قبل ما أروح التحقيق .. سيادتك راضى عنى ولا لأ.. أنا خايف أكون عملت حاجة أغضبت سيادتك من غير ما أقصد .



المهم - ياساتر عليك . أنت زنان فعلا .



المرشح - أرجوك يافندم تريحنى . سيادتك راضى عنى ..؟!



المهم - راضى عنك ياسيدي . استريحت ..؟!



المرشح ( يتنهد ) - الحمدلله . طالما سيادتك راضي عنى أروح التحقيق وأنا مطمئن ..



المهم - خلاص . سيبني أشوف شغلي



المرشح - يافندم أنا طمعان في كرم سيادتك . عندي موضوع أخير مهم جدا .



المهم - خليه بعدين



المرشح - لا يافندم أرجوك . الموضوع لا يمكن تأجيله



المهم - قل بسرعة . اخلص .



المرشح - يافندم أنا تعلمت من سيادتك الديمقراطية واحترام ارادة الشعب .لكن يافندم البلد بيمر بلحظة دقيقة .. البلد على كف عفريت .. الانتخابات الرئاسية قربت واستطلاعات الرأى مقلقة جدا .لازم رئيس مصر يكون شخصية كبيرة عاقلة وحكيمة يعرف يعدي بالبلد الى بر الأمان . . هل يمكن يافندم اننا نسلم مصر لشخص متطرف زى عبد المنعم ابو الفتوح ولا واحد ناصري زى حمدين صباحي ولا الولد خالد على الشيوعي . دول بتوع هتافات ومظاهرات يافندم عمرهم ما يتحملوا مسئولية . أى واحد من دول لو كسب الانتخابات تبقى مصيبة



المهم - الشعب المصري العظيم يقدر يميز الصالح من الطالح .



المرشح - صح . تمام يافندم



المهم - أؤكد لك ان الانتخابات الرئاسية نزيهة



المرشح - منتهى النزاهة يافندم



المهم - بعد انتهاء الانتخابات سيتم اعلان النتيجة من اللجنة العليا للانتخابات . قرارات اللجنة لا يجوز الطعن عليها .. أى شخص يشكك في نتيجة الانتخابات أو يزايد علينا احنا نعرف نقطع له لسانه .



المرشح - تمام يافندم . كل ده جميل ورائع .أنا عارف ان شعبنا عظيم وواعى ومتأكد ان الانتخابات هتكون نزيهة لكن يافندم أنت سيادتك عودتنا على الصراحة .. أنا قلقان يافندم . رئيس مصر منصب خطير ولو أى واحد من الثلاثة سواء ابو الفتوح أو حمدين أو خالد على . فاز في الانتخابات وبقى رئيس تبقى مصيبة . مافيش ولا واحد فيهم متوازن . لو أى واحد فيهم حكم مصر أسبوع البلد راح يسقط في المجهول لا قدر الله .



المهم - ما تقلقش



المرشح - ياريت سيادتك تقول لي كلمة تريحنى



المهم - بأقولك ما تقلقش



المرشح - يعنى ايه يافندم ..؟



المهم - انت ايه ما بتفهمش عربي ..؟! . بأقول ما تقلقش يعنى بالعربي الفصيح لا تقلق



( يضحكان )



المرشح - خلاص. فهمت .ربنا يكرمك يافندم ويخليك لمصر



المهم - يالله اتفضل مع السلامة . انت عطلتنى . أنا قدامي يوم طويل



المرشح - مع ألف سلامة يافندم . .





عزيزي القاريء .. هل تعرف من هو المرشح الرئاسي ومن هو الشخص المهم .. اذا توصلت الى الاجابة الصحيحة برجاء التفضل بارسالها عبر البريد الالكتروني وسوف تحصل باذن الله على هدية قيمة .. ..

الديمقراطية هي الحل

العنوان الالكترونى

Dralaa57@yahoo.com




http://alaaalaswany.maktoobblog.com/1622327/مقالة-علاء-الاسوانى-فى-جريدة-المصرى-11/
 
أعلى